ՀՀ նախագահ Սերժ Սարգսեան շնորհաւորական ուղերձ յղած է ԼՂ անկախութեան տօնին առիթով:
“Սիրելի՛ արցախցիներ, Շնորհաւորում եմ ձեզ Լեռնային Ղարաբաղի անկախութեան տօնի առթիւ:
Արցախի ժողովրդի պատմական ընտրութիւնն այլեւս անշրջելի իրականութիւն է: Ողջ հայութեան
աջակցութեամբ, եւ առաջին հերթին ձեր անկոտրում կամքի, ձեր գերմարդկային ջանքերի ու ճիգերի
շնորհիւ, ինչպէս նաեւ մեծագոյն զոհողութիւնների գնով դուք ստեղծեցիք եւ կայացրիք պետականութիւն: Լեռնային
Ղարաբաղի Հանրապետութիւնն այսօր հպարտօրէն կարող է կանգնել աշխարհի բոլոր այն երկրների
շարքում, որոնք շահեկանօրէն տարբերւում են իրենց կազմակերպուածութեամբ, հզօր բանակով
եւ պետական կուռ կառոյցներով: Ժողովրդավարութեան խորացումը, մշակութային ու կրթական վերելքը,
ինչպէս նաեւ տնտեսական աճի տեմպերը Լղհ-ում տպաւորում են ոչ միայն մեզ: Արցախը եւ՛ իրեն,
եւ՛ աշխարհին արդէն ապացուցել է, որ կայացած եւ ծաղկուն պետութիւն լինելու համար ունի
հզօր քաղաքակրթական պաշար: Մեզ պարտադրուած պատերազմը եւ սահմանների երկայնքով իրականացուող
պարբերական սադրանքները ոչինչ են այն հզօր ոգու համեմատութեամբ, որ առաջնորդում է արցախցուն
եւ ողջ հայութեանը: Այդ ոգին առաջնորդեց մեր հերոսներին դէպի ազատամարտ եւ այդ ոգին
է մեզ այսօր առաջնորդում դէպի արարում: Սիրելի՛ հայրենակիցներ, Կրկին շնորհաւորում
եմ բոլորիս այս մեծ տօնի կապակցութեամբ: Մաղթում եմ խաղաղ երկինք եւ առաջընթաց”:
ԼՂՀ
նախագահ Բակօ Սահակեան շնորհաւորական ուղերձ յղած է ԼՂՀ անկախութեան 23-րդ տարեդարձին
առիթով: “Սիրելի հայրենակիցներ, Իշխանութիւնների եւ անձամբ իմ անունից
ի սրտէ շնորհաւորում եմ բոլորիդ մեր կարեւորագոյն պետական տօնի` Արցախի Հանրապետութեան
օրուայ առթիւ: 1991 թուականի Սեպտեմբերի 2-ը շրջադարձային եղաւ արցախահայութեան կեանքում
եւ դարձաւ նրա դարաւոր երազանքների իրականացման սկիզբը: Այն ազդարարեց Արցախի Հանրապետութեան
ծնունդը, որն արդիւնք էր մեր ժողովրդի երկարամեայ մաքառումների ու անկոտրում կամքի: Մենք
վերջապէս նուաճեցինք մեր հողի վրայ ազատ ու անկախ ապրելու իրաւունքը, ապրելու համամարդկային
ու ազգային արժէքներին, ժողովրդավարական նորմերին ու միջազգային սկզբունքներին համահունչ: Այդ
ճանապարհին մեզ սպասում էին ինչպէս դաժան փորձութիւններ, այնպէս էլ մեծ յաղթանակներ,
յաղթանակներ, որոնք ձեռք բերուեցին անասելի կորուստների ու զրկանքների, մեր հերոս քոյրերի
ու եղբայրների թափած արեան գնով: Դրանք հնարաւոր դարձան համայն հայութեան միասնականութեան
ու համախմբուածութեան, մեր ժողովրդի անսասան ոգու ու անձնուիրութեան շնորհիւ: Ուղիղ
մէկ ամիս առաջ ղարաբաղա-ատրպէյճանական սահմանին տեղի ունեցած դէպքերը ցոյց տուեցին, որ
Արցախի Հանրապետութիւնն ուժեղ է ու անառիկ, քանի որ նրա սահմանին կանգնած է իր հողն ու
տունը պաշտպանող զինուորը, կանգնած է ողջ հայ ժողովուրդը: Այդպէս է եղել այս 23 տարիների
ընթացքում, այդպէս կը լինի այսուհետ: Թանկագին հայրենակիցներ, Մէկ անգամ եւս շնորհաւորում
եմ ձեզ եւ մաղթում խաղաղութիւն, քաջառողջութիւն, երջանկութիւն ու ամենայն բարիք ձեր ընտանիքներին,
զօրացում ու բարգաւաճում` մեր հարազատ Արցախին”: