Օպամա արտօնած է Սուրիոյ վերեւ հետախուզական թռիչքներ կատարել։
ԻԹԱՐ-ԹԱՍՍ լրատու գործակալութիւնը` վկայակոչելով ամերիկեան վարչակազմի յայտարարութիւնը,
կը հաղորդէ, որ Միացեալ Նահանգներու նախագահ Պարաք Օպամա գաղտնի սպասարկութեանց արտօնած
է հետախուզական թռիչքներ կատարել Սուրիոյ վերեւ: Միացեալ Նահանգներ կը սերտեն Սուրիոյ
եւ Իրաքի տարածքին մէջ ՏԱՀԵՇ խմբաւորման դէմ պայքարելու կարելիութիւնը, իսկ ատիկա կատարելու
համար Ուաշինկթընին անհրաժեշտ է արժանահաւատ տեղեկութիւն: Այդպիսի տեղեկութիւններ
ստանալու գործին մէջ հետախուզական թռիչքները կարեւոր տարր կը նկատուին: Ըստ փորձագէտներու,
այդ քայլին կրնան յաջորդել օդային հարուածները: Սպիտակ տան կից Միացեալ Նահանգներու
Ազգային անվտանգութեան խորհուրդէն յայտնած են, որ ՏԱՀԵՇ-ի դէմ պայքարին մէջ Ուաշինկթըն
մտադիր է օգտագործել բոլոր կարելիութիւնները: Օպամա երէկ նաեւ յայտնեց, որ ՏԱՀԵՇ¬ը
քաղցկեղի նման է եւ անոր վերջ տալը այդքան ալ դիւրին պիտի չըլլայ: Ան նշեց, որ այս հարցով
իր երկրին ռազմավարութիւնը շրջանային ու միջազգային դաշինք ստեղծելն է եւ ՏԱՀԵՇ¬ի դէմ
պայքարին աջակցիլը: Օպամա նաեւ ընդգծեց. «Պիտի չարտօնենք, որ մեր զինուորները Իրաքի
մէջ պատերազմի մէջ ներքաշուին»: