Մոսկուայի եւ համայն Ռուսիոյ պատրիարքը կը դատապարտէ Իրաքցիներուն դէմ գործադրուած հարստահարումը
որակելով զայն որպէս ճշմարիտ ''ցեղասպանութիւն''։
Զանգուածային սպաննութիւնը որ ներկայիս կը գործադրուի Իրաքի քրիստոնեաներուն դէմ ճշմարիտ
''ցեղասպանութիւն'' մըն է յայտարած է Մոսկուայի եւ համայն Ռուսիոյ պատրիարք` Կիւրեղ Ա,
մատնանշելով որ ծայրայեղ մահմետականները բռնագրաւելով Մուսուլը տիրացած ու մզկիթի վերածած
են քաղաքին 45 եկեղեցիները, եւ կողոպտած են քրիստոնեաներու բոլոր ինչքերը։ Ի տես
այս ողբալի ու անողորմ դէպքերուն, Ռուս օրթոտոքս եկեղեցին իր ցասումը կը յայտնէ ի պաշտպանութիւն
Իրաքի քրիստոնեաներուն։ Նշենք որ Ռուս Օրթոտոքս եկեղեցւոյ կայքը տարիներէ կը տեղեկագրէ
Միջին Արեւելքի քրիստոնեաներու ողբալի իրավիճակի մասին, որ տարուէտարի կը վատթարանայ,
եւ կոչեր կ`ուղղէ վերջ դնելու բռնութեան, վերահաստատելու քաղաքական երկխօսութիւնն ու
խաղաղութիւնը ու պաշտպանելու հալածուած կրօնական փոքրամասնութիւնները։ Մոսկուայի Պատրիարք
Կիւրեղ իր կոչին մէջ կը յիշեցնէ որ կրօնական բնոյթ ունեցող ծայրայեղութիւնը լուրջ մարտահրաւէր
մըն է միջազգային հասարակութեան համար։