Ֆրանչիսկոս Պապի ցաւակցական հեռագիրը ի լուր կարտինալ Մարքիզանոյի մահուան։
Կարտինալ Ֆրանչէսքօ Մարքիզանոյի մահուան ի լուր, Ֆրանչիսկոս Քահանայապետը ցաւակցական
հեռագիր մը ուղղած է ննջեցեալի ծննդավայր` Թորինօ քաղաքի Արքեպիսկոպոս` գերապայծառ Չէզարէ
Նոզիլիային, որուն մէջ իր ցաւակցութիւնները կը յայտնէ կղերին, հաւատացեալներուն եւ կարտինալի
ազգականներուն։ Սրբազան Քահանայապետը ապա ընդգծած է ննջեցեալ ծիրանաւորին նուիրական
ծառայութիւնը ի սպաս եկեղեցւոյ եւ իրեն յանձնուած հաւատացեալներուն ու հեռագիրը եզրափակած
է աղօթք բարձրացնելով առ Աստուած որպէսզի անոր հոգին ընդունի մշտնջենաւոր խաղաղութեան
մէջ։ Յայտնենք թէ Իտալացի կարտինալ Ֆրանչէսքօ Մարքիզանոն իր մահկանացուն կնքեց հռոմի
մէջ, կիրակի 27 յուլիս 2014-ին, 85 տարեկանին։