Ռայի Պատրիարքը կոչ ուղղեց բոլոր երեսփոխաններուն ներկայ գտնուելու նախագահական ընտրութեան
խորհրդարանական նիստերուն։
Ս. Զատկուան տօնին առիթով` հանրապետութեան նախագահ զօր. Միշել Սլէյման ուղղուեցաւ Պքերքէ,
ուր ներկայ գտնուեցաւ մարոնի համայնքի Պշարա Ռայի պատրիարքին նախագահած պատարագին: Նախքան
պատարագը, նախագահ Սլէյման հանդիպում մը ունեցաւ Ռայի պատրիարքին հետ` ներկայութեամբ
Սֆէյր նախկին պատրիարքին: Իր արտասանած քարոզին մէջ Ռայի պատրիարքը կոչ ուղղեց բոլոր
երեսփոխաններուն ներկայ գտնուելու այսօրուան եւ յաջորդող բոլոր նախագահական ընտրութեան
խորհրդարանական նիստերուն: Ան շեշտեց նաեւ զէնքը մէկդի դնելու եւ ահաբեկչութեան ու
վայրագութեան վերջ տալու եւ երկխօսութեան վերսկսելու անհրաժեշտութիւնը` յանգելու համար
քաղաքական բարեկարգումներու: Իր կարգին, նախագահ Սլէյման պատրիարքին հետ իր ունեցած
հանդիպումէն ետք լրագրողներուն հետ իր ունեցած զրոյցին ընթացքին լիբանանցիներուն միասնականութիւն
մաղթեց` բարձր գնահատելով Լիբանանի մէջ տիրող ապահովական կայունութիւնը: Ան նշեց,
որ Լիբանան լուրջ վտանգներ դիմագրաւած է, սակայն կրցած է պահպանել իր միասնականութիւնը: Նախագահ
Սլէյման վերահաստատեց, որ ինք դէմ է պաշտօնավարութիւններու երկարաձգման, որովհետեւ անիկա
ժողովրդավարական չէ: Ան ընդգծեց, որ հանրապետութեան նախագահ պէտք է ընտրուի որոշ անձնաւորութեան
մը կամ թեկնածուի մը կեցուածքներուն հիման վրայ: Նախագահ Սլէյման շեշտեց, որ մեծագոյն
սխալը նախագահական ընտրութեան յատուկ խորհրդարանական նիստերուն մասնակցութիւնը պոյքոթի
ենթարկելն է, որովհետեւ անիկա կը նշանակէ երկխօսութիւնն ու համախոհութիւնը պոյքոթի ենթարկել: Հանրապետութեան
նախագահութեան տեղեկատու գրասենեակը երէկ հրապարակեց հաղորդագրութիւն մը, որուն մէջ նշուեցաւ
հետեւեալը. Հանրապետութեան նախագահ զօր. Միշել Սլէյման համոզուած է, որ Լիբանանի մեծագոյն
մարտահրաւէրն է շարունակել երթը եւ սահմանադրութեան ճշդած ժամկէտին մէջ ընտրել հանրապետութեան
նոր նախագահ մը: Ան կոչ ուղղեց խորհրդարանը բաղկացնող երեսփոխանական բոլոր պլոքներուն
ապահովելու անհրաժեշտ ներկայութիւնը` ընտրել կարենալու համար երկրին յաջորդ նախագահը: Նախագահ
Սլէյման շեշտեց, որ լիբանանեան ազգային շահերը շատ աւելի բարձր են, քան արտաքին ու անձնական
նեղլիկ շահերը: Նախագահ Սլէյման յոյս յայտնեց, որ խորհրդարանը կարենայ ստանձնել իր
պատասխանատուութիւնը եւ ընտրել հանրապետութեան նոր նախագահ մը` նախքան 25 մայիս 2014-ը: